تنہائی

اللہ تنہائی کے شر سے بچائے اور تنہائی کے عذاب سے بھی۔

اور اللہ تنہائی کے فضل سے نوازے

کندھا

نیکی، دل کی نرمی، دوسروں کا بھلا چاہنا، غیروں کا بھی اور ان رشتوں کا بھی جو اوکھے اور تیکھے ہوتے ہیں، بھلا چاہنا، اپنی ذات سے اوپر ہو کر سوچنا اللہ کی توفیق خاص اور مقام شکر۔
وہ توڑنے والوں نہیں جوڑنے والوں کو پسند کرتا ہے۔
عجیب وہ جو اسی رب کا نام لیتے اور پھر سورہ الفلق اور الناس کی تفسیر بن کر توڑتے ہیں۔
پکے مومن ہونے کا غرور جو ان کے ایمان اور دوسروں کے رشتے کھا جاتا ہے۔
وہ کندھا جھٹکنے نہیں کندھا دینے والوں کو پسند کرتا ہے۔
اور کندھا سب کو چاہیے ہوتا  ہے، زندگی کی کسی نہ کسی مرحلے پر، یا پھر زندگی سے گزر کر آگےجانے والوں کو بھی، پیچھے رہ جانے والوں کو بھی ،بوجھ ہلکا کرنے کی خاطر. جتائے بغیر، توڑے بغیر۔ معوذتین کی تفسیر بنے بغیر، کندھا دینا بھی صدقہ ہے۔

’’لوگ کیا کہیں گے‘‘

پچھلی نسل کا المیہ یہ تھا کہ وہ سوچتی تھی کہ ’’لوگ کیا کہیں گے‘‘ اور اس نسل کا المیہ یہ ہے کہ یہ کسی بات میں بھی اپنی ذات سے آگے نہیں سوچتی ، یہ نہیں سوچتی کہ ’’دوسرے کیا سوچیں گے‘‘۔۔۔ چاہے وہ دوسرے قریبی رشتے ہی ہوں

پہچان

انسان کی پہچان ، یہ پہچان کہ اس نے آپ کو کوئی قابل استعمال شے سمجھا یا انسان ، تب ہوتی ہے جب اس کی غرض اس کی ضرورت پوری ہوچکی ہو، جب اسے مزید آپ سے کوئی غرض نہیں رہتی، تب اس کی لاتعلقی اور بے حسی کمال ہوتی ہے۔

ایک پرانی تحریر

​

​

خزاں یاس نہیں، آس کا موسم ہے، زندگی کے نہ ختم ہونے والے تسلسل کی علامت۔ پو شش برگ و گُل بدلتی ہے، گِل بدلتی ہے، اور وہ جسے اسے گِل سے تخلیق کیا گیا ہے، اُسے اس کی تخلیق یاد دلائی جاتی ہے، یاد دلایا جاتا ہے کہ جب تک زندگی ہے زندہ رہنا ہے۔ کسی نہ کسی روپ میں، کسی نہ کسی رنگ میں اس تسلسل کا ، اس گردشِ پیہم کا حصہ بنے رہنا ہے، یہی مقدر ہے، یہی مشیت، یہی حکم الٰہی۔۔۔ یہاں کسی کو قیام کی اجازت نہیں، کسی کو ثبات نہیں، وقت کی بہتی رو سب بہائے چلی جاتی ہے اور اس کے دھارے کے ساتھ بہتے رہنا مقدر ہے، بڑھتے رہنا نصیب ہے۔ گرتی شاخیں، اڑتے پتے، انجام کار اسی گِل کا حصہ بنتے ہیں، آنے والے موسموں میں جس سے پھر سبزہ پھوٹتا ہے، بہتے پانی منجمد کر دئیے جاتے ہیں مگر ان کی گہرائیوں میں زندگی پھر بھی رواں رکھی جاتی ہے،زمینوں اور زمانوں پر پھیلی اسی گردشِ پیہم کا حصہ بادل جو سمندروں کے بیٹے ہیں پہاڑوں پر جن کا گھر ہے، پیڑوں کی سوکھتی، چٹختی ٹہنیاں موسم بدلنے پر پھر سے لچکیلی ہو جاتی ہیں، انار کے پیڑ کی طرح، شب بھر میں جس کی سوکھی شاخوں میں لچک آتی ہے اور ایک صبح کی دھوپ میں وہی زندگی اور ہر لچک سے محروم شاخیں انار رنگ کونپلوں سے ڈھک جاتی ہیں۔اور وہ شاخیں جن پر پھول نہیں کھلتے، جن کے رنگ نہیں بدلتے، پرندے ان پر بھی بسیرا لیتے ہیں، ان کی کھوہ بھی کسی گلہری کا آشیانہ ہوتی ہے۔ زندگی درد ہے، کرب ہے، کرب کا قافلہ نہیں رکتا۔ ایسا اذن کسی کو نہیں، حکم نہیں۔ سفر جاری رہتا ہے۔۔۔ اور وہ جو اصل خالق ہے، وہ موت سے ​​زندگی اور زندگی سے موت پیدا کرتا ہے۔ صرف اسی کو دوام، قیام، اس گردشِ پیہم سے فرار حاصل ہے۔ ہاں مگر کچھ اور ہیں جنہیں اس گردش کا حصہ رکھتے ہوئے بھی دوام بخش دیا جاتا ہے۔۔۔

۔۔

لیکن میں یہاں پھر آؤں گا
بچوں کے دہن سے بولوں گا
چڑیوں کی زباں سے گاؤں گا
جب بیج ہنسیں گے دھرتی میں
اور کونپل اپنی انگلی سے
مٹی کی تہوں کو چھیڑے گی
میں پتی پتی کلی کلی ، اپنی آنکھیں پھر کھولوں گا
سرسبز ہتھیلی پر لے کر، شبنم کے قطرے تولوں گا
جاڑوں کی ہوائیں دامن میں
جب فصل خزاں کو لائیں گی
رہرو کے جواں قدموں کے تلے
سوکھے ہوئے پتوں سے میرے
ہنسنے کی صدائیں آئیں گی
دھرتی کی سنہری سب ندیاں
آکاش کی نیلی سب جھیلیں
ہستی سے میری بھر جائیں گی
میں ایک گریزاں لمحہ ہوں
ایام کے افسوں خانے میں
میں ایک تڑپتا قطرہ ہوں
مصروفِ سفر جو رہتا ہے
ماضی کی صراحی کے دل سے
مستقبل کے پیمانے میں
میں سوتا ہوں اور جاگتا ہوں
صدیوں کا پرانا کھیل ہوں میں
میں مر کر امر ہو جاؤں گا
میں یہاں پھر آؤں گا

ماننا اور منوانا

منوانے سے پہلے ماننا پڑتی ہے۔۔۔اور کبھی تو مان کر بھی منوانا محال ہوتا ہے جبکہ ہم ہیں کہ بغیر مانے منوانے کی خواہش رکھتے ہیں۔

استعفیٰ

اب تک کتنی ہی بار میں نے اسے لفظ لفظ پڑھا اور پوری طرح محسوس کیا ہے۔ اور کیوں جی چاہتا ہے کہ ایسا ہی ایک استعفیٰ عموماً دنیا کے اور خصوصاً اس سوشل میڈیائی دنیا کے نام لکھا جائے۔

یہ سوشل میڈیائی دنیا جس نے ہمیں صاف گوئی کے نام پر منہ پھٹ، بے لگام بنا دیا ہے۔ ایسے ایسے کڑوے لفظ کیا، جملے ۔ کبھی ایک دوست نے میرے محض Hate کے لفظ کے استعمال پر کہا تھا کہ کیوں، اتنا Strong لفظ کیوں، Dislike کا لفظ بھی تو ہے۔ اور میں نے اس کی بات پلے باندھ لی۔ ہاں، خدا نے مجھے تو بڑی بڑی اچھی دوست دیں، وہ سبھی جو اَب اس مصروف دنیا کی بھیڑ میں میری ہی طرح خود کو اجنبی محسوس کرتی ہیں، اور بیزار اور مایوس ہوکر گم گئی ہیں۔ پر بات یوں کہ اب کی دنیا میں ایسی دوست بھی کہاں رہی ہیں؟ اب تو سیر پر سوا سیر کی دنیا، آگ پر تیل ڈالنے کی رسم والی دنیا۔ کانٹا رکھو تو اس پر کانٹا رکھ دینے والی دنیا، تو پھر دنیا رویوں کے کانٹوں سے بھر جائے تو حیرانی کیسی؟

یہ مصنوعی، روکھی، بے ڈھنگی ،خودغرض، بے حس دنیا جہاں جھوٹ یوں بولا جاتا ہے کہ جیسے ”چکی تھلے ہتھ آیا اے“۔ جہاں ہر بات ہر شے ہر احساس بس ”میں“ ”میرا“ ”میرے لیے“ سے متعلق ہے۔ Self interestedدنیا۔ بہت برس پہلے اپنی ڈائری کے کسی صفحے پر لکھا تھا ، ہم اب ”خاندان“ نہیں ”فیملی“ کا لفظ استعمال کرتے ہیں، ”خاندان“ سکڑ کر اب ”فیملی“ بن گئے ہیں میں، میرا میاں یا بیوی اور بچے اور وہ بھی تو کہیں کہیں مزید سکڑ کر میری اور صرف میری ذات۔ ”میری ذات“ کہ بس دنیا اسی کا طواف کرتی رہے۔ یہ بھی کبھی لکھا تھا کہ Independence سے بڑی کوئی چیز Interdependence ہے، لیکن ہمیں اب Independence چاہیے، ہر کسی سے، ہر ذمے داری سے آزادی۔ اس سوچ سے آزادی کہ کوئی دوسرا کیا سوچے، کیا محسوس کرے گا۔ ہماری ذات سے کسی کو کیا مل رہا ہے یا ملے گا، ہمیں کیا! میں نے اس ہنڈیا میں ڈالا کچھ نہیں تھا، لیکن پک کر بریانی قورمہ میرے سامنے پھر بھی آجائے۔ دیا کچھ نہیں، مل سب کچھ جائے۔ ذمہ داری نہیں اب تو بس ’’لائف انجوائے‘‘ کرنے کا زمانہ ہے۔ ہم کہ جنہیں اپنی مزدوریوں اور مزدور پیشہ ہونے پر فخر تھا، اب ہمیں گھروں میں آٹھ دس سال کی یا جو بھی ملازم بچے بچیاں چاہیئیں، ذرا ذرا سے کام کے لیے۔ ہمیں سہل پسندی چاہیے، تاکہ ’’انجوائے‘‘ کرسکیں۔ باتیں، اکھاڑ پچھاڑ، خواہ مخواہ کی کھودم کھود ، بلاوجہ کے تجسس، اِس نے اُس سے یوں کہا، ٹائپ۔۔ وہ چیزیں جن سے ہمارا تعلق نہیں ہم ان میں ناک گھسیڑتے ہیں، اور جہاں ذمہ داری اور تعلق ہے وہاں ہماری بے تعلقی ایسی کمال ہے۔

وہاں کہ جہاں ہمیں اپنے سامنے بیٹھے لوگوں، بڑوں سے بات کے لیے وقت اور زحمت نہیں، اور ہم ہر اچھی بری خبر وٹس ایپ اور فیس بک وغیرہ سے دور بیٹھے ان لوگوں سے ضرور شیئر کرتے ہیں، جن سے ہمارا حقیقت میں کوئی واسطہ نہیں، جن سے شاید زندگی میں ایک آدھ کے علاوہ ہماری ملاقات نہ ہوئی ہو، یا وہ بھی نہیں۔ اور پھر امید بھی ہم رکھتے ہیں کہ اس خبر پر داد دی جائے، مبارک دی جائے یا ہمدردی کی جائے اور نہ کی جائے تو دل میں ناراضی بھی ہوکہ جناب آپ نے سٹیٹس ہی نہیں دیکھا ہمارا۔۔۔ ہم بولتے ہیں، لگاتار بولے جاتے ہیں مگر ’’بات‘‘ کی ہمیں فرصت نہیں۔ بلکہ سامنے بیٹھے لوگوں سے ہم بذریعہ سوشل میڈیا ہی گفتگو کرتے ہیں۔ برسبیل تذکرہ۔۔۔

جہاں ہم لوگوں کو اُن کی عمر کی رعایت دینے کو بھی تیار نہیں۔ یہ سوچے بغیر کہ ان سفید سروں والے لوگوں نے زندگی کو کیسا کیسا جھیلا ہے، اب ذرا ان کی زندگی میں بھی کوئی ٹھہراﺅ، کوئی آسانی آجائے۔ذرا جو ہم اپنے رول شفٹ کرکے ”لینے اور لیتے رہنے“ کے مقام سے بس ذرا سا ”دینے“ کے مقام پر آجائیں۔ ان کے کسی کیے یا نہ کیے اعتراض پر اپنے رویے کا تھپڑ ان کے منہ پر نہ ماریں۔ اب تو ہمیں کسی بڑے کے سامنے جھکنے میں بھی عار ہے۔ ہماری انائیں۔۔۔۔

کس قدر پیاری ہے ہمیں یہ سوشل میڈیائی دنیا کہ یہ سارے رشتوں کو کھا گئی ہے۔ انہیں نبھانا اب اتنا اہم بھی کیوں ہو۔ بھول ہی گیا کہ ہر احساس دوطرفہ ہوتا ہے، شکایت بھی۔ لیکن ”میں“ اور ”میرا“ کے سامنے ”ہم“ اور ”ہمارا“ ہار گیا ہے۔

دہرے تہرے اور جانے کتنے کتنے چہروں والی دنیا، جہاں نہ مصلحت باقی ہے نا مصالحت۔

اب کیا کہیں کہ جی ہم نے لفظوں اور رویوں کی مار ایسی کھائی ہوئی ہے کہ ہمیں ان اٹھتے قدموں کی منزل، آنکھوں،اور ان کے پیچھے کھوپڑی اور اس میں موجود خیال تک رسائی ہو گئی ہے، مگر ہم خاموش رہیں گے، کیوں کہ دوسروں کے پردے فاش کرنا ہم پر واجب نہیں۔ اس لیے کہ خدا تو خود پردہ پوش ہے۔ تو چلو بھئی، ہم پچھلی صدی کے ناکارہ سکّوں جیسے لوگوں کو اجازت دو۔۔۔آنے والے کل میں ہمیں حنوط کرکے کسی میوزیم میں سجا لینا کہ ہم اسSelf interested نسل سے ہوتے ہوئے بھی اس کے ہوئے نہ ہی اپنے۔۔۔

برگ زرد یا سیب سرخ

درخت سے بچھڑتے دونوں ہی ہیں لیکن

پتہ وقت کے ساتھ اپنے زوال کی انتہا کو پہنچ کر گرتا ہے

اور پھل اپنے کمال کی انتہا کو پہنچ کر۔۔۔

اب یہ تم پر ہے کہ تمہیں برگِ زرد بننا ہے یا سیب سرخ۔۔۔

۔ ماخوذ

ریس کی شرط

وہ گھوڑا جو ریس میں شامل نہ ہو، اس پر نہ کسی کی نظر جاتی ہے اور نہ کوئی اس پر شرط باندھتا ہے۔۔۔

تعریف اور تعارف

اپنی تعریف اور اپنے تعارف میں فرق ہوتا ہے، فرق رہنا چاہیے

حقوق و فرائض

جب آپ فرائض ادا نہ کر رہے ہوں تو حقوق سے از خود دستبردار ہو جانا چاہیے۔

ڈر

ذومعنی بات یہ ہے کہ جن لوگوں سے معاملات میں آپ اللہ سے ڈرتے ہیں کہ کہیں آپ کے ہاتھوں کوئی ناانصافی یا زیادتی نہ ہو جائے، بعد میں وہی لوگ ہوتے ہیں جو آپ کو ڈرانے لگتے ہیں۔۔۔

نرگسیت

صرف اپنی ذات کے عشق میں مبتلا شخص خود سے وابستہ لوگوں کے لیے عذاب بن جاتا ہے لیکن۔۔۔۔

اپنی ذات کے یک طرفہ عشق میں مبتلا شخص دوسروں کے لیے ہی نہیں خود اپنے حق میں بھی عذاب ہوتا ہے۔۔۔۔

تکبر

کسی کے بڑھاپے کو نوجوانی کی نگاہ سے دیکھنا اور کسی کی نوعمری کو بڑھاپے کی نگاہ سے دیکھنا ۔۔۔دونوں ہی ایک طرح سے تکبر ہیں

نسب اور نسبت

نسبت کے لیے نسب کا تعلق ضروری بھی نہیں۔۔۔

انسانی بلیک ہول

بلیک ہولز صرف خلا میں نہیں ہوتے، کچھ انسانوں کے اندر اتنا بڑا خلا ہوتا ہے کہ اس میں بلیک ہول وجود میں آ جاتے ہیں۔۔۔ اپنے قریب آنے والی ہر شے کو نگل جاتے ہیں، اور حرص و ہوس کا یہ بے انت کنواں پھر بھی نہیں بھرتا، بھر ہی نہیں سکتا۔۔۔

کچھ انسان بلیک ہول ہوتے ہیں۔۔۔۔

قلب، قبلہ اور انقلاب

مکرر۔۔۔

جب نہ قلب درست ہو نہ قبلہ۔۔ تو انقلاب کہاں سے آئے گا اور کہاں آئے گا

فورس آف نیچر

کچھ لوگ فورس آف نیچر ہوتے ہیں، ان سے بحث نہیں کی جاسکتی،ان کا دماغ مکمل طور پر نارمل انسانی دماغ ہوتا بھی نہیں۔۔۔ ان کا دماغ عام انسانوں کے معمول کے احساسات اور جذبات کو سمجھنے اور محسوس کرنے سے عاری ہوتا ہے۔۔۔ وہ سامنے والے شخص کو دیکھ کر ان جذبوں کی صرف نقل کرسکتے ہیں حسب ضرورت، انہیں محسوس کبھی نہیں کرتے۔۔۔ ان کا رستہ روکا جا سکتا ہے نہ انہیں بدلا جا سکتا ہے۔۔۔ انہیں ’’معاف‘‘ بھی نہیں کیا جاتا۔۔۔ سانپ آپ کو کاٹ جائے یا کوئی طوفان رستے میں آ لے تو اسے الزام نہیں دیا جاتا، اسے معاف بھی نہیں کیا جاتا، بس مان لیا جاتا ہے کہ یہ قسمت تھی بس جو آپ کو سانپ کے رستے میں لے آئی۔۔۔اس کے بعد بس اپنا رستہ بدل لیا جاتا ہے۔۔۔ معافی، گلہ شکوہ یا الزام ، انسانوں کے لیے ہوتے ہیں، نارمل انسانوں کے لیے۔۔ جو غلطی بھی کرتے ہیں اور دوسروں کی غلطیوں کا نشانہ بھی بنتے ہیں۔۔۔ فورس آف نیچر کے لیے، انسانی نہیں مگر ’’انسان نما‘‘ دماغ کے لیے، معافی ہوتی ہے نہ الزام نہ شکوہ۔۔۔۔

خودغرضی

خودغرضی کی بدترین صورت وہ ہے جو کسی مثبت جذبے کے، محبت کے بھیس میں سامنے آتی ہے۔۔۔یہ الجھاتی ہے، دوسرے رشتوں پر مکمل کنٹرول چاہتی ہے، جینے کا پاسپورٹ اپنے قبضے میں لے کر۔۔۔ نہ ختم ہونے والے مطالبے کرتی ہے، کیوں؟ ‘‘کیوں کہ ہمیں تم سے محبت ہے نا’’ اور لینے اور صرف لیتے رہنے کے بعد بھی مطمئن نہیں ہوتی کہ ‘‘دوسروں نے، اپنوں نے ہمارے لیے بھلا کیا کیا’’۔۔۔

دائمی جہان

اس دنیا کی خوبی ، خوبصورتی اور خامی بھی، یہی ایک بات ہے کہ یہاں سب کچھ عارضی ہے، سب کچھ بدل جائے گا، بدلتا رہے گا، دوام نہیں ہے، نہ کسی حالت کو، نہ کسی احساس کو، نہ کسی شوق کو، نہ کسی انسان یا رشتے کو۔۔۔ بہتر بدتر میں بدل جاتا ہے، بدتر بہتر میں۔۔مگر بدلتا ضرور ہے۔۔۔یہی بات جو ناامید کرتی ہے، امید بھی دلاتی ہے۔۔۔
اور اگلا جہان، اگر کسی کو یاد رہے تو۔۔۔۔ اس کی خوبی، خوب صورتی اور ڈرا دینے والی بات یہی ہے کہ وہاں کچھ بھی نہیں بدلے گا، دوام رہے گا، ہر حالت کو، ہر حال کو۔۔۔
اگر یاد رہے تو۔۔۔اس بدلتے جہان میں وہ دائمی جہان۔۔۔۔یاد رہے تو۔۔

سدا نہ رہسن شاخاں ہریاں، سدا نہ پھل چمن دا